最新圏生活

【BB不來了】錢、樓、教育 近2成青年唔生BB

 

香港青少年協會青年研究中心成立的「青年創研庫」上月訪問咗520名20-39歲青年對生育嘅睇法。調查結果顯示:

● 近8成(78.8%)人認為一個理想家庭應該有2個或以上嘅小朋友

● 近2成(18.3%)受訪者表示將來唔會生

● 56.7%受訪者認同「香港的居住環境不適合有子女」,64.8%認同「養育子女對家庭是一個經濟負擔」

 

雖然8成人覺得生2個或以上係理想家庭,但只得一半 (54.3%) 將來真係會咁做。而喺近2成話唔生嘅人當中,7成 (71.4%) 人嘅原因係因為養仔女要使好多錢,5成4人認為係房屋問題,近5成(47.3%)話係教育制度問題。

 

青年創研庫指,香港嘅育兒政策並不友善,建議政府考慮:

● 提供生育津貼,例如向首兩名子女及第三名或以上的子女,提供2.5-3萬嘅生育津貼

● 以14星期產假和5天男士侍產假作起步點,並定期檢討,以逐步延長產假和侍產假;

● 設6日有薪育兒假

● 增加資助幼兒中心和服務名額;

● 立法設立「支援母乳餵哺工作間」等

 

建議幾好,不過大家都係幻想吓先啦。

 

圖: 商報

【又炒美心流沙奶黃月餅】

【又炒美心流沙奶黃月餅】

琴日(25/7)朝早,各大美心西餅嘅門口,堆積咗大堆人群,原來又係為咗買流心奶黃月餅券!有人凌晨四點就開始排,七點半開售,十點就已經全線售罄,餅舖門外亦已經即時有唔少人收月餅券,收購價$260左右,原價$228一張,都有$30賺嘅,但係網上已經炒到$380一張,一盒月餅啫使唔使呀。話說上年已經有有好多人炒燶月餅,唔知今年又會吾會呢。

【美洲獅子闖入民居乖乖瞓覺】

 

美國俄勒岡州一個女網民分享,早前一隻美洲獅可能因為逃避山火而太攰,竟然走咗入佢屋企,匿喺梳化後瞓咗一大覺!由佢上載嘅相同片段見到,隻美洲獅好平靜,甚至帶點可愛,同平日猛獸形象極大反差。

 

屋主Lauren Taylor屋企嘅後門面向一個草地同樹林,佢同同屋主返到屋企見到隻獅子大嚇一跳,同屋仲大叫,嚇到隻獅子差子想衝向一隻閂咗嘅窗逃走。Lauren強調自己對於點樣運用能量、以及面對動物都有豐富經驗,佢喺窗外見到隻獅子瞓覺嘅姿勢好平靜,當聽到一啲聲音打開眼時,Lauren同隻獅子對望,佢透過好溫柔同好似貓咁眨眼嚟示好,隻獅子似乎收到,又同佢眨返眼轉頭。

 

瞓咗差不多6個鐘後,隻獅子休息夠就走咗出去無再返轉頭。雖然有網友提議俾啲食物、水引佢走,但Lauren就話咁會拎隻獅子將人同食物連想起嚟,千萬唔好咁做喎。

 

圖: Lauren Taylor@ Fb

【外賣32杯飲品 客人趕收工取消柯打 小店大呻浪費】

有小店喺社交網站分享,話收到一張送32杯飲品到政府合署嘅訂單,一個鐘後小店做好飲品,通知客人就快送到,點知個客表示「就收工, 無人飲, 所以唔要」,大呻蝕唒本。

 

有網友曲到圓咁話,「1個鐘32杯野太過分了。。應該一接到32杯咁大單生意即該落閘唔做街客,再入多十幾廿部機加請多幾個臨時工一齊同步整,做好單生意」、「即沖即有?」;但亦有人話「如果沖野飲加送過去要超過一個鐘既,人家叫外賣時應該要覆客人所需時間吧」,可能兩邊都無溝通好,大家都有責任。

【請勿超越圍繩】大媽越界影相 慘遭御林軍推開

去到英國, 喺溫莎堡英女王官邸觀賞御林軍步操可以話係遊客指定動作。網上瘋傳一條短片,一名國藉不明、黑頭髮、鮮黃裙加涼鞋嘅大媽為咗同御林軍影張近距離合照,企咗出圍繩外,仲企正喺步操嘅路中,結果被御林軍大力推開,向前仆咗幾步,幸好無跌低或整傷。

 

網友都熱烈競猜片中人係咩國藉,但亦有網友認為無論係咩國藉,都應該要守規秬。而英國國防部就表示,御林軍很自豪能夠保衞英女王陛下,對於世界各地民眾來觀賞步操儀式亦深感榮幸;設置圍繩是為了保護公眾及士兵,請各位設勿超越。

【育兒祕方?!】網傳育兒書教路  BB夜哭用媽咪底褲笠頭定驚

BB仔玩就幾得意,但喊起上嚟真係好可怕!最近網上流傳一張相,針對「小孩夜哭不止」,建議用媽媽嘅底褲笠著BB個頭!

 

張圖係簡體字,疑似係一本教人育兒嘅書,有「小孩拉肚子久治不好」同「睡覺打呼嚕」嘅飲食療法,又話「小孩夜哭不止,用小孩親生母親內褲洗乾淨、曬乾,每晚睡覺時把內褲戴在小孩頭上,哭立止,連戴3-5個夜晚」。

 

如此神奇方法,原來並非祕方,有網友話「之前真係有朋友咁教」,更加令人驚訝嘅係有網友話試過!「我試過,係無效嘅,個囝仲嚇到面青青,喊到轉唔倒聲!」

【唔發惡當病貓】同獅子影相手多多 女遊客被咬動物園拒賠償

 

烏克蘭一個女人到克里米亞一個野生動物園同獅子合照,仲伸手搞人地啲毛,隻獅子突然發惡攻擊,好彩工作人員及時制止,唔係就俾獅子分咗屍啦。個女人事後指控園方只係安排園內獸醫為佢治療,又唔俾佢報警,佢要求賠償但被園方拒絕。

 

動物園話個女人事前已經簽免責聲明,曾經飲酒,又堅持要摸獅子鬃毛,話隻獅子可能唔鐘意佢身上陣酒除而施襲。

 

其實調返轉諗,隻野獸被人類捉咗困著已經好慘,就算去參觀係咪可以尊重少少呢?

 

#個人冇事都已經執返身彩啦

【設計嘅嘢…】2018年香港主題新鈔各具特色

 

金管局同3間發鈔銀行推出新銀紙,各張都有不同香港特色嘅主題,20蚊紙─茶藝文化;50蚊紙─生態保育,印有本港稀有嘅寬帶青鳳蝶;100蚊─文化傳承,印咗個粵劇花旦;500蚊─自然風貌,有六角形岩柱:至於1000蚊就係智慧都會,有個人頭。呢啲新銀紙將於今年第4季至2020年推出。

 

不過呢批銀紙嘅設計就唔係人人識欣賞,有人話有粵劇花旦嘅100蚊紙好詭異,500蚊似陸沉、1000蚊似照x光。你又覺得靚唔靚呢?

【想學日本嘅你有無幫手執垃圾?】

前排世界盃有唔少熱話,當中日本球迷係睇完比賽後將看台啲垃圾執乾淨,震驚全球人類,港人知道呢件事之後都稱讚有加,仲話要仿效。

 

但係最近有市民發現,書展過後係會展隔離嘅一條樓梯,成地都係書展嘅單張,有不少網民看過呢張相之後都斥責班「垃圾蟲」,又慨嘆香港人質素愈來愈低。但有網民就指,書展吸引各地遊客,或者不只係港人所為;另外又指,周地垃圾又不是香港獨有情況,「每次大型event都係咁嫁啦,巴黎紐約如是,東京亦如是」。亦有人猜測,可能係啲傳單跌咗喺地,「似係派d人成疊跌左俾人踢踢下變成咁,至少係其他位都唔見有呢個情況……keep住咁多人行,都未必想執,或者想執都難」、「如果派左50萬張得果度咁少,咁唔算嚴重,淨係單憑地下嘅棄置數量並不能說明情況」。

 

圖: 連登討論區

【榴槤「剝皮」點食呀? 】

 

近日有位人兄,買咗自己人生第一個榴槤番屋企食,「打開」之後發現竟無!果!肉!

發生啲咁離譜嘅事,佢就去問個friend點好啦,點知……被佢個friend笑到傻咗呀!

 

小編註: 批走榴槤層皮同啲釘,係點做架呢? 真心想學嘢!

頁面