最新

【圈短片】【創科未來靠你哋!】佛教黃允畋中學中五學生發明機械手臂 奪國際機械人大獎  蔡嘉駿:想幫助殘疾人士彈奏鋼琴

//小編睇完個機械手真係覺得好勁,其實我哋香港都有好多青年熱衷創科事業。一齊畀個Like,支持佢哋繼續加油!//

【真實版蠟筆小新 兩歲童怕打針撲護士】

相信唔少人都睇過動畫《蠟筆小新》,入面嘅小新人細鬼大,最鍾意同年輕貌美嘅大姐姐親近。以為呢啲情節係純屬虛構?咁台灣一位兩歲男童用行動話畀大家知係真嘅。

呢位現實版嘅小新叫做多多,佢媽咪帶佢去診所打預防針。可能打完針真係好痛,多多大喊起上嚟,媽咪即刻抱起安慰佢。點知多多見到啱啱返診所返工嘅護士姐姐,就直撲過去要姐姐抱,媽咪想接過嚟抱返都被嫌棄、唔肯制添!

從多多媽咪喺Facebook分享嘅片段所見,多多被護士姐姐抱住,佢個頭貼住姐姐嘅心口係道喊。媽咪忍唔住講笑話佢好明顯係「吃豆腐」,被姐姐抱咗足足15分鐘,而且喊嗰陣其實一滴眼淚都冇㗎 XDD 媽咪話想抱返多多,但完全被多多無視,直言「瞬間玻璃心碎」。之後多多見到姐姐換咗護士制服,發覺頭先抱住自己嘅靚姐姐,其實同幫自己打針嘅係同一班人。媽咪話佢「馬上翻臉不認人,超好笑的」。

好多網友睇完段片,都話好「羨慕」多多,「放開那個姐姐」,另外亦有人懷疑媽媽大肚嘅時候睇得太多小新,所以多多先會小新「入血」呢!

 

圖:「羽俊&又元的生活點滴」Facebook專頁、網絡

【人狗情難斷 臨別依依相擁痛哭】

養過狗嘅人就會知,狗仔唔只聰明、忠心,佢哋對人嘅愛仲好pure、好true。同朝夕相對嘅主人分離時,會依依不捨甚至落淚。

近日,內地一名男子為咗生計,需要到外地工作,冇辦法再照顧由細養到大嘅狗狗。佢離開之前,四圍打聽,幫狗狗喺本地搵到個新主人。到咗要將狗狗交畀新主人嘅日子,當男子向新主人介紹狗狗作息時間、飲食喜好同生活習慣等寄養事項,狗狗似乎意識到將要同主人分開,竟然開始流眼淚。

諗住可以好瀟灑同好順利咁交出狗狗嘅男子,忍唔住用好重嘅語氣話狗狗:「你小子在新主人家,就要給我乖乖聽話」,但講完冇耐自己就哽咽落淚。男子想狠心離開,但走咗幾步又返轉頭攬住狗狗,人狗一齊喊,場面傷感。

睇到呢個情景,網友都淚崩了,「狗狗乖,主人賺到錢返嚟探你」。

 

圖:優酷

【識食一定係咁食】網民集思廣益分享「創意月餅料理」

中秋節一過,屋企嘅月餅堆積如山,有時真係聽到蓮蓉都飽。為咗加快消滅啲月餅,有網民喺網上跪求創意月餅料理,希望能夠盡用月餅各部分,創作新煮意,例如「咸蛋黃可以做黃金蝦」,咁另外蓮蓉同月餅皮又可以點搞呢?

有人就經典回帶、創意月餅料理祖師爺嘅作品「蕃茄月餅」,睇成品嘅做法非法簡單,就係煮熟蕃茄後加入切件嘅月餅,上碟!呢個拋磚引玉亦引嚟網民如潮水般嘅各式煎炒煮炸炆燉焗做法,真係「創作力量同幻想會嚇你一跳」,一定梗有一款啱你口味啦!今晚追月夜一於加餸啦!

嚟啦!發揮你嘅想像力,話俾我哋知你嘅「創意月餅料理」菜式啦!

【圈短片】【「創科博覽2018」大玩VR!個個都畀LIKE!】施小朋友:第一次玩、我覺得好正 劉小朋友:如果用VR就可以喺堂上互動一下 林先生:更加印象深刻、我相信佢玩完之後若干年仲記得

//「創科博覽2018」直到2/10日會喺會展舉行,場內咁多攤位入面,最受歡迎嘅非VR莫屬!個個玩完之後都話好正,仲唔快啲去試下?//

【中秋好節目 一定唔會悶】

今日中秋節,偏偏天氣唔多好⋯⋯睇怕都幾難見到又大又圓嘅八月十五的月光嘞,唔知大家有咩節目呢?

 

若果天氣唔太差嘅話,大家不妨去賞下花燈。而家維園舉行緊「戊戌年中秋綵燈會」,係全港最大型花燈會,今晚8點至11點會有「綵燈晚會」。如果認為賞花燈有啲文靜,想睇刺激啲嘅節目,大家可以喺今晚8點15分到銅鑼灣大坑,欣賞舞火龍表演,表演會持續到10點半。若果今晚出唔到去,上述兩個節目喺聽日(25/9)都仲有得睇。

 

另外,大家仲記得的話,舊年利東街嘅特大月亮裝置變咗繼主角月亮之後,第二大熱門中秋必影物。今年利東街同中港城再接再厲,同國際著名澳洲藝術家Amanda Parer合作,展出10隻曾於80多個城市及40個國際藝術節巡迴展出嘅巨型月兔藝術裝置INTRUDE。又大又白又pure,真係十分應節!

 

好啦,介紹咗咁多,最重要都係好天、好天、好天!

 

祝各位有得早放!天公造美,中秋節快樂!

 

圖:網絡

【焦點新聞】中國大使館譴責瑞典電視台播辱華節目 要求立即道歉

中國駐瑞典大使館發聲明,譴責有瑞典電視台播出辱華節目。聲明中提到,有關節目主持人羅恩達爾發表惡毒侮辱攻擊中國和中國人的言論,形容有關言論是赤裸裸散播、宣揚種族主義和排外主義,公然挑起煽動針對中國及其他族裔的種族仇視和對立,而節目內使用的中國地圖缺少台灣省及西藏部分地區,是嚴重侵犯中國主權和領土完整。

大使館批評有關節目已經突破了人類道德底線,嚴重挑戰人性良知,嚴重違背媒體職業道德,要求瑞典電視台及有關欄目立即道歉,並保留就此采取進一步措施的權利。

圖片來源:中國駐瑞典大使館網頁截圖

【抄襲0分冇得上訴 教授:「勿致歉、勿申訴、勿求情」】

貓咪係人見人愛嘅動物,唔同品種嘅貓都各有「奴才」喜愛。但有一種貓相信係人見人憎,嗰種就係copycat嘞。近日,中國科學院大學副教授蘇湛怒斬copycat,將22位抄襲功課嘅學生評為0分,而且用文言文出電郵,講明「此分不改」。

蘇教授係「科幻文學與影視創作系列講座」課程嘅老師,這個課程嘅成績有兩部分:考勤60%,期末功課40%,而今學期嘅期末功課係創作科幻作品。本來就算唔交功課,出席率夠應該都可以合格,但蘇教授喺批改過程中見到有學生嘅作品「好到唔正常」,於是上網逐字逐句搜索,發現呢啲學生果然係抄襲網上作品,甚至抄法國作家凡爾納(Jules Gabriel Verne)嘅作品!

蘇教授認為抄襲對其他學生好唔公平,特別係嗰啲雖然文筆唔好,但依然努力創作嘅學生。於是佢決定重罰有抄襲嘅學生,158位選修學生中,有22位被判定抄襲,唔只功課0分,仲要「不問考勤,皆黜落」,全科肥佬。佢仲話做老師嘅一個基本原則,就係唔可以對抄襲行為姑息縱容。

 

圖:網絡、歷史趣聞

【焦點新聞】元朗發生三級火 消防在起火單位發現一名死者

昨日下午5時許,元朗十八鄉路138號翹翠峰一個單位發生三級火警,消防處派出19架消防車及救護車,以及72名消防員和救護員到場。消防動用一條喉及四隊煙帽隊灌救,又用雲梯將起火單位相鄰單位露台的3名女子和小童救回地面,並疏散170人。

消防救熄大火之後,在起火單位內的走廊發現一具燒焦屍體,死者為56歲的女住客,而起火原因仍然在調查之中。

圖片來源:RTHK畫面截圖

頁面