最新圏生活

【烏鴉清潔工】

 

唔知大家細個果陣有無聽過《伊索寓言》入面嘅一個烏鴉飲水嘅故仔?故事裏面嘅烏鴉搵到個裝住半樽水嘅樽,但因為個嘴太短,飲唔到,於是聰明嘅烏鴉就去叼啲石仔落個樽度,等個水位升高,烏鴉就可以飲到水喇。

法國一個叫Puy du Fou嘅主題公園,唔知係咪受《伊索寓言》啓發,利用烏鴉嘅高智商,開始訓練6隻烏鴉負責清理樂園地下嘅垃圾。烏鴉會叼走煙頭同比較細嘅垃圾,仲會將呢啲垃圾叼去個細盒度收集埋一齊,超醒啊!烏鴉完成任務之後,職員會用食物嚟做獎勵。呢6隻受訓緊嘅烏鴉入面有一隻已經開始當值,加入清潔小組。樂園負責人話訓練烏鴉做清潔工,除咗可以保持園內清潔,仲可以推廣環保,宣揚愛護環境嘅信息。咁有意義,小編覺得烏鴉清潔工將來肯定會成為呢個樂園嘅熱門景點囉。

圖:《力報》

【台灣忠犬醫院守候7日 等主人一齊返屋企】

 

狗狗係人類嘅好朋友,對人類忠心不二,台灣有隻忠犬「拉拉」就再一次證明咗呢一點。

話說高雄有個70歲嘅婆婆因為發燒要送院留醫,而婆婆養嘅一隻黃色狗狗拉拉竟然一直跟住婆婆去醫院,仲堅持喺醫院出面等婆婆,屋企人點叫佢都唔肯走!為咗避免拉拉被當成流浪狗捉走,婆婆嘅屋企人掛咗個牌喺拉拉條頸度,個牌寫住:「(我不會咬人)你好,我的主人在住院,我在顧車等主人!」點知婆婆一住院就住咗已經一個禮拜有多,拉拉亦都喺醫院門口等足咁耐!

原來婆婆係糖尿病患者,拉拉似乎都好擔心婆婆,一直以來都陪伴佢左右,半步不離。喺醫院守候期間有好心人俾嘢佢食,佢都唔肯食,剩係一臉擔心樣咁望住醫院門口,靜靜咁等婆婆出院。好感動~不過大家都唔洗擔心拉拉會餓親,因為婆婆嘅屋企人每日都會送食物同水俾拉拉。

希望婆婆快啲好返出院,帶拉拉一齊返屋企喇!!

圖:可愛動物讚一個

【呃LIKE不成惹負評】網民鬧爆玩KIKI Challenge 港姐陳苑澄道歉

應屆候選港姐、前組合As One成員陳苑澄(Tania)早前拍咗一段「KIKI Challenge」,挑戰者要喺汽車慢駛期間落車沿路跳舞,並由駕駛者拍攝整個過程。雖然Tania喺影片中施展渾身解數展現舞技同柔軟身段,但影片上載後只有一面倒負評,因為整過KIKI Chanlenge嘅過程實在太危險,唔止挑戰者容易受傷,亦都影響到其他路面使用者,更有網民質疑佢亂拋垃圾。喺外國就有挑戰者喺行車道路上玩KIKI Challenge而被車撞倒受重傷。

事件發生數日後Tania喺出席港姐活動時多次就事件道歉,唔知大家接唔接受呢?

KIKI Challenge係由外國網紅Shiggy帶起,佢以歌手Drake的《In My Feelings》為背景音樂拍成影片,所以名為「In My Feelings Challenge」,而因為歌詞中一句「Kiki, do you love me?Are you riding」故又名為「KIKI Challenge」影片上載到Twitter同Instagram 後被爭相仿效,唔少明星歌手都有拍片挑戰,但因為挑戰進行嘅方式實在太危險,好多國家同地區嘅政府都已經發出警告,提醒道路使用者要專心,埃及等國家更加禁止民眾玩呢項活動。

暗黑兒童「毒」物            小朋友偷嘢唔好偷咁多?

書本可以帶我哋認識唔同嘅世界。唔少家長為咗培養小朋友閱讀興趣,會買啲圖書俾小朋友睇。不過要小心嘞,唔好似為有啲插圖得得意意就一定係啱小朋友睇。

 

有網友分享,話有媽媽喺學校收到一本繪本,叫《貪心的貝貝》,係學校嘅「閲讀獎」禮物。個媽媽收到諗著自己睇一次先俾小朋友睇,結果大吃一驚,令佢好不安。故事內容大概係話狡猾嘅狐狸貝貝厄隻兔仔,話阿媽病咗,要偷雞蛋俾阿媽食。隻善良嘅兔仔信咗,仲幫佢引開獵犬同把風,狐狸就去偷雞蛋。不過狐狸太貪心,全部雞蛋都要偷,結果被大公雞同獵犬發現,偷蛋不成滿身傷。

 

之後兔仔大義凜然教訓隻狼:「你太貪心了。如果你少拿一些蛋,就不會耽誤時間而被公雞和獵犬追上了。」隻狼亦好後悔:「是啊,早知道就少拿一點,至少我現在還有蛋可吃,也不會受傷了。」之後兔仔仲話要請狐狸飲佢偷返嚟嘅紅蘿蔔打汁添。

 

嘩,幾「勵志」、幾「警世」,仲帶幾分溫情添!

 

家長網友們都非常憤怒同震驚,「好癲丫,完全吾想分享呢本故事,難怪有d小朋友品格會係甘。。」、「禮崩樂壞到咁?定係其實哩本係暗黑格林童話」。

 

其實學網友們話齋,家長們自己把關,唔好買咗啲書就當小朋友會鍾意睇書,自己同佢一齊睇,咁咪安全囉。

 

【不分膚色的界限】路過救咗個「污糟B」 上海婆婆收養黑人BB 18年如親孫

18年前,上海婆婆朱水寶一如往日去買餸,路過一個草叢時聽到有BB喊聲,發現一名出世無耐嘅男棄嬰,朱婆婆帶咗BB返屋企,仲同佢沖咗幾次涼,但都洗唔走BB身上嘅「污漬」,帶畀醫生睇,原來男嬰係一名混血兒,天生黑皮膚。

當年嘅朱婆婆一家人生活並不富裕,但朱婆婆話:「既然我這隻手托了他,我苦中苦,我要托到底,讓他能在中國好好過!」於是18年來,朱婆婆一家都視呢名混血BB如自己人,供書教學、幫佢爭取戶籍,仲幫佢改咗個好有氣勢嘅名,叫「朱軍龍」。

朱軍龍今年已經18歲,英文麻麻,但講得一口流利普通話,除咗膚色之外同一個中國人無異。朱軍龍即將入讀大學,朱婆婆話無論幾辛苦都會供佢讀大學。好在朱軍龍亦都好生性,雖然形容自己係「肥宅」,但非常孝順,經常抽時間陪朱爺爺同朱婆婆。男仔講到「愛」就唔好意思,但睇得出,朱軍龍非常愛朱婆婆一家。

含辛茹苦咁湊大咗個孫,但朱婆婆仍不求回報:「以後奶奶不要你養,自己要過好自己的生活」。喺朱婆婆身上睇到真正嘅大愛,係不分血緣,不分種族同膚色。

【你嚇我唔到嘅】巨型蝙蝠倒掛休息 網民:人扮架?

可能好多人都鍾意蝙蝠俠,對傳說中嘅吸血鬼德古拉伯爵有幻想,但如果喺現實生活中見到隻人咁高嘅蝙蝠,應該會嚇到癲咗...最近有網民喺FACEBOOK「爆廢公社」分享咗一張蝙蝠相,詢問蝙蝠品種。只見圖中一隻人咁高嘅蝙蝠倒吊喺屋簷下休息,模樣就好似電影嘅德古拉伯爵。

有網民認出佢應該係「馬來大狐蝠(Large flying fox)」,以水果為食物,地球上現存數目已不多。有人就畀呢隻蝙蝠嘅體型嚇親,仲笑問「其實係咪人扮架?」

炒賣幾百張美心流心奶黃月餅券    網民: 留返俾你自己食曬佢!

 

美心流心奶黃月餅券早排開售,多個地點都現長長人龍,原價$228一張,淘寶、各大討論區即時出現炒賣價,高至$360幾都有。最近有港女喺買賣區大曬月餅券,留言嘅網民都不恥其所為,高呼:「自己食哂佢啦」。

 

就咁目測,個賣家起碼有二、三百張券,唔少人都LM等睇賣家「食一年月餅」、「慢慢自己食哂佢啦」、「睇鑊燶」,又估計食唒的話,賣家分分鐘奶皇便便都有得佢痾。有啲好心網民就留言「300蚊收二張有意pm」。不過賣家一於少理,繼續囂張,話多謝大家推post,有買家搵佢。有網友轉截媒體報報炒燶月餅嘅新聞,賣家就淡淡定咁話「請分清楚奶黃同流心先啦, 同記者一樣傻」。

 

其實食月餅都係想應吓節啫…..

 

圖: 買賣交換(香港) 7 11/ok 便利店 麥當勞 惠康 萬寧等贈品印花公仔換購物品 @Fb

【我最想住嘅地方?】世界宜居城市香港升至35位 亞洲第三

 

經濟學人智庫(EIU)公布「2018世界宜居城市排行榜」。澳洲墨爾本連續7年取得嘅榜首位置被奧地利首都維也納去,而日本大阪就躍升6位至第3位,係亞洲城巿之冠。至於香港就排第35,較2017年跳升10位,比紐約(57位)、倫敦(48位)呢啲大城巿還要高。

 

日本嘅大阪(第3位)、東京(第7位)今年都打入10大,主要係因為罪案率減低同公共交通服務改善。

 

2018世界宜居城市排行榜頭10位:

第1位:維也納

第2位:墨爾本

第3位:大阪

第4位:卡爾加里

第5位:悉尼

第6位:溫哥華

第7位:多倫多、東京

第9位:哥本哈根

第10位:阿德萊德

【殺人鯨BB死去 媽媽傷心抱屍游17日】

鯨魚擁有哺乳類動物嘅溫柔、智慧和情感。一條活躍於加拿大溫哥華島海域嘅殺人鯨媽媽早前因初生BB夭折,傷痛欲絕,更抱屍同游起碼17日先放手,母子之情令人動容。

 

殺人鯨媽媽佗BB嘅時間比人類懷胎十月更長,佢地一般會佗著BB 15-18個月先生BB,而BB亦會跟著媽媽大約2年,以母乳餵哺,所以鯨魚媽媽同BB嘅感情,不會比人類嘅母子關係疏遠。喪子嘅鯨魚媽媽代號為J35,專家觀察到佢喺7月底開始托著已死嘅幼鯨同游,伴屍最少17日最終忍痛放手,讓愛子深埋海底。幸好嘅係佢似乎心情已逐漸回復正常,並開始進食。

 

專家解釋,鯨魚媽媽抱屍同游係佢哋傷痛、悼念嘅方式,以往亦曾有類似情況出現。而更叫人心痛嘅係,呢條鯨魚媽媽可能係10年內先後失去2條幼鯨,所以至有如此哀痛表現。

 

圖:我們的島

【家燕姐演唱會MV瘋狂洗板            Captain Nancy拯救地球】

已經68歲嘅薛家燕Nancy 今年12月會喺紅館開演唱會,而演唱會嘅主題曲尋日上載到Facebook,唔夠一日已經有2千幾個Like、千幾個留言、千幾個轉載,Captain Nancy已經征服網絡世界嘞!

 

MV中嘅家燕姐以女俠造型出動,全副盔甲上陣,額頭更鑲有閃石,大跳十字步,Rap著擊退一班壞人包括鄭丹瑞、唐文龍、林敏聰、田雞,叫大家「跳十字步 拾回自己的態度」咁話!

 

家燕姐嘅演唱會《The Sound of Nancy 薛家燕愛你無限60年演唱會》係為咗慶祝佢入行60周年,12月4、5號紅館開show,家燕姐仲話「好想同你地瘋狂跳十字步」添。

 

早前有網民藉復仇者聯盟熱潮拎家燕惡搞,笑指佢粒招牌墨就係最後嘅寶石,更可以絕殺十字步拯救池力共鎮咁話。但好玩得嘅家燕姐一啲都無嬲,仲即時出張Captain Nancy poster同大家玩盡佢。

 

計一計,68歲嘅Nancy入行60年,咁咪即係8歲入行?? 能夠到今時今日都仍然咁有活力、咁玩得、咁可愛,Captain Nancy呢個老人家真係好正呀!

 

圖: 薛家燕@Fb

頁面