最新圏生活

Looop-x-on菇男-母親節banner768x90.jpg

【好人好事】炎夏 網友頭暈 獲街坊陪伴、等白車

酷熱天氣警告持續生效,天文台預測未來幾日會繼續係天晴同酷熱,最高氣溫約33度,新界會再高一兩度!真係行出街都熱到暈…政府都提醒大家,要提防中暑!

有女網友係FB群組「Fanling 粉嶺」發貼,話:「中午時分,自己感覺意識模糊,開始眼前一黑!幾位女仕陪伴我,阿叔給水我飲,直至救護車到了,幾位好心人才離開。」

佢係貼文多謝街坊同救護員嘅熱心幫助,仲話「人間有情」。網民都留言問候:「小心身體呀」,仲有網民溫馨提示:「天氣熱,多啲飲水,太陽猛就帶把遮」。

圖片:Fanling 粉嶺 fb

【你會唔會睇?!】《深宮計》你最期待邊個角色嘅演出?

《宮心計2之深宮計》係5月21日已經開始播出,雖然話係《宮心計》嘅續集,但係演員就大換血。《宮心計》嘅主角佘詩曼﹑楊怡﹑陳豪﹑鄭嘉穎,全部換走,連米雪姐係《深宮計》入面都係客串角色,而且佢客串所飾演嘅韋后,一出場就畀馬浚偉飾演嘅平王李隆基同馬國明飾演嘅任三恕殺死。

今次《深宮計》嘅主演陣容,由馬浚偉、馬國明、胡定欣、劉心悠、周秀娜、陳煒、蕭正楠、黃心穎、謝雪心同羅霖等好戲之人出演。而劉心悠同周秀娜呢兩位女神更加係第一次加入公仔箱,希望可以帶嚟新鮮感啦。《深宮計》咁陣容鼎盛,你又最期待邊個女角嘅演出呢?

圖片:TVB

【安靜了】油尖旺區議會通過取消旺角行人專用區

實施咗18年嘅旺角行人專用區原意係希望俾大家行得舒服啲、安全啲,不過近年被一批「表演者」進駐,不論好聽唔好聽,音量問題都對附近居民、商戶都做成極大困擾,油尖旺區議會尋日討論由經民聯議員提出的取消專用區動議,結果以大比數通過取消旺角行人專用區!不過幾時實施就未有交代。

 

始終陪咗大家咁多年,有無啲唔捨得呢?

 

圖片來源: 文匯報

【大熱天時痴著唒…】東鐵綫半個位都被人攝 網友睇見到嬲嬲

東鐵綫真係咩時間都咁多人,以為有個位可以安安樂樂? 太天真。

 

有位爸爸喺社交媒體分享,話一家人坐東鐵綫,女女太攰瞓咗喺媽媽大脾,依圖所見,兩母女坐咗喺二人座位,留咗0.5個空位出嚟,列車去到九龍塘站有個女人問都唔問就咁逼埋去坐,搞到佢好嬲嬲,其實唔只佢,連啲網友睇見都嬲,「少少位就攝入去坐,企陣會死咩」、「我會開口叫佢走」。不過解決方法又唔一定要激進嘅,「唔使開口鬧既,平心靜氣講係2個人坐就得」、「文化差異,其實同佢地講番就得」。

 

你又有無遇過類似情況?

 

 

圖片: Tai Po 大埔@ fb

【有請林夕】小學中文功課填詞玩殘家長 網民開填詞大會

 而家啲小學功課,已經超越咗家長可以幫拖嘅程度。有家長喺FACEBOOK專頁「Tai Po 大埔」分享咗一份小朋友嘅功課,內容係要求學生為貝多芬嘅《快樂頌》填詞,仲要求內容要同「好公民」有關。

網民睇到呢份功課都嘩嘩聲,有人話「林夕小學生果時都未必填到。。。」,仲有網民話讀K2嘅囡都收到份類似嘅功課。網民驚訝於功課難度之餘,亦隨即開咗個填詞大會,大家都好慷慨咁分享自己嘅作品。

有貼題版 --- 「服務社會 關愛別人 叫世界增添歡欣 樂善好施 慷慨助人 貢獻更多不覺睏」;
有交功課版 --「好好公民 好好公民 好好公民 好公民...」;
同寫實版--「日日八點,功課晚做,我腦細胞,死得早」。

功課係畀學生重溫學過嘅嘢,搞到咁難到底為乜?
 
原圖:Tai Po 大埔
 

【倒數21日】世界盃即將開鑼 重要日子要記低

仲有唔夠一個月,2018俄羅斯世界盃開鑼嘞!

比賽由6月14日至7月15日進行,俄羅斯慢香港5個鐘,賽事大部份喺香港時間晚上8點、11點、凌晨2點上演,放工都可以睇到,絕對係靚時間!

 

今屆世界盃Now TV同Viu TV都有得睇,Now 獨家播足64場,而Viu就會免費播其中19場,當中包括揭幕戰(14/6 23:00 俄羅斯對沙特阿拉伯)、兩場4強賽(11/7 02:00, 12/7 02:00)及15/7晚上11點嘅總決賽。另外16/4 2:00 葡萄牙對西班牙呢場大戰viu都有得睇,亦係不容錯過!

 

女人一個月有幾日等別燥,男人就只係四年一次,嗰個月特別唔可以騷擾,各位女友、老婆、阿媽,就算唔睇開波,呢啲重要日子記得mark低嘞!

【真真假假】翻版新垣結衣拍日劇惹負評

真· 新垣結衣傳被星野源私有化後將會息影,呢個消息令好多網民心碎。而有內地「新垣結衣」之稱嘅龍夢柔,卻因此而更備受中日網民關注。

龍夢柔早前就接拍一個日本廣告,已經被人話刻意模彷結衣BB。最近佢客串出演日劇《愛情重跑》嘅其中一集。佢浮誇嘅演技更被國內外網民一致狠批,網民仲話佢口大、中日文口音好重,「演技尷尬,中國話日語都說不好,哭戲還瞎咧嘴笑。」

龍夢柔個樣雖然都可愛,不過一開口就會穿崩呢…

圖片:IG@_lovererun_、《逃恥》及《愛情重跑》截圖

【悄悄話你知…】麥當勞取消早餐時段特價包供應

而家食個飯真係拿埋都要四五十蚊,臨近糧尾,諗著仲有「窮人恩物」麥記特價包可以頂吓,點知原來暗地裡改咗條款,差啲中伏!

 

 

魚柳包、豬柳蛋漢堡、麥香雞包一直都係做緊全日特價$11,不過最近有網友留意到,原來條款暗暗地改為「只於早上11時後生效」。魚柳包11點前食由$11變到$16,豬柳蛋漢堡由$11變到$17,而麥香雞就11點後先有。

 

可能大家唔係好似小編我咁窮困啦,有網友就話「我都好耐冇食老麥啦, 乜原來加價咩?」,但亦有人話「好過分囉,無可能朝令夕改架嘛,我決定11點前罷食呀」。

【你點睇?】騰訊暫延期播放《深宮計》

大台無線重頭劇《宮心計2之深宮計》係星期一(21日)係翡翠台首播,原定內地騰訊網係同步播映,仲要畀香港提早30分鐘(即8點)播出。點知香港播完第一集,騰訊網仲依然未播放。直至當晚深夜11時17分,騰訊網係微博發文致歉,指「《宮心計2之深宮計》因故暫時延期」,具體播出時間再另行公佈。

大批為煲《深宮計》而付費成為會員嘅網民係微博留言,話「怎麼不明年才通知呢?」,亦有網民擔心「就怕他無限期推遲,直到我會員過期」,有網民提議「最好全集上,我當今晚無事發生」。

圖片:網絡、騰訊看電視微博截圖

【係咪要搵尺度】小朋友「出」上闊下窄 老師打交叉

唔怪得學生話讀書有壓力。FACEBOOK專頁English Lesson for Freedom分享咗一則圖文,照片入面有一份畀老師批改嘅小學生功課,老師用紅筆圈起錯處仲扣分,但離奇嘅事發生啦!老師圈起咗個「出」字,但網民個個都睇唔明到底小朋友邊度錯喎!而專頁就寫話:老師講:「個『出』字錯,因為上闊下窄。」

呢個答案就引起網民嘅熱烈討論,有人留言就話「邊個話出寫一定要上窄下闊?」,仲話老師「捉得咁正」。不過都有網民撐老師:「正體字就係咁,一筆一劃都要學清楚。」、「有時候老師呢種都捉到,都算係真心教書。」

你又點睇呢?

圖片:English Lesson for Freedom FB
 

頁面