【校服驗出含致癌物   消委會建議著前先洗一次】

9月開學,就快又要買過啲校服準備嘞。不過消委會檢查發現有校服樣本驗出帶有致癌物芳香胺嘅偶氮染料,長期穿著經皮膚吸入或致癌!

 

調查抽取咗49個校服樣本,其中2款驗出致癌物,包括「心怡校服」公司買到嘅上水鳳溪第一中學連身裙校服,喺配飾布製格仔腰帶位置,檢出4-氨基偶氮苯(4-aminoazobenzene),濃度超出內地標準1倍;以及「成順發校服」買嘅

嶺南中學女裝上身衫3條灰色綑邊布料,濃度超出內地標準7倍。不過喺呢2個樣本嘅主體布料、以及其餘47個樣本都無發現致芳香胺。有專家指出,今次發現芳香胺樣本嘅位置接觸皮膚機會較少,降低咗風險。

 

另外調查又發現,有8款樣本含致癌嘅甲醛,濃度由每千克12毫克至32毫克不等,符合內地標準。由於甲醛可溶於水中,所以消委會建議消費者穿著新校服前應先清洗1次,減低影響健康風險。

 

此外,「成順發校服」嘅長褲、「維多利校服」嘅連身裙酸鹼值超出內地標準容許範圍,容易引致皮膚敏感,不過經清洗一次後酸鹼值已達致容許範圍內。