【走塑行動】蔗渣都有無限可能        台灣年輕人首創甘蔗飲管救地球        

膠飲管喺香港仲未被禁止或要俾額外收費,但見到啲海洋動物個肚塞滿塑膠,走塑需求刻不容緩!台灣有班年輕人研發咗用甘蔗做嘅飲管,有望幫手減少污染!

 

唔用膠飲管可以有咩替代品? 紙飲管雖然環保啲啲,但有人話好易溶;亦有人話唔用飲管更好,但飲開珍珠奶茶嘅粉絲,又或鍾意飲凍飲嘅人就未必同意嘞,啲冰水喺唒杯面,又係幾難飲嘅。台灣一班年輕人創立品牌「100%植」,由2017年開始研發用植物原料做食具,研發出用蔗渣製成甘蔗纖維吸管,仲有竹製餐具,一方面可以將農業廢物變成安全、環保嘅食具,亦可以能改善環境污染,真係非常好!

 

呢款甘蔗纖維飲管可以喺零下20度使用都無問題,保存期限一年,可重複使用,棄置喺土地亦可被分解,團隊委託咗大學,研究甘蔗飲管喺海洋分解嘅情況,希望對海洋生態都一樣友善。飲管仲未正式推出巿場就已經大受歡迎,收到大量大陸廠家查詢,希望買斷佢哋嘅技術。雖然都好想賺錢,不過佢哋最終決定將技術保留,並正與世界各地嘅製造商研討,例如係法國酒莊探討葡萄渣嘅用處,希望為農業廢棄物創造更多可能。

 

甘蔗纖維吸管有不同嘅粗幼,飲珍珠奶茶都無問題。2包幼飲管(6mm*21cm, 一包100支) + 1 包粗飲管(12mm*21cm, 一包40支) 售價係新台幣$500,約$130港元。