最新圏生活

【真實版蠟筆小新 兩歲童怕打針撲護士】

相信唔少人都睇過動畫《蠟筆小新》,入面嘅小新人細鬼大,最鍾意同年輕貌美嘅大姐姐親近。以為呢啲情節係純屬虛構?咁台灣一位兩歲男童用行動話畀大家知係真嘅。

呢位現實版嘅小新叫做多多,佢媽咪帶佢去診所打預防針。可能打完針真係好痛,多多大喊起上嚟,媽咪即刻抱起安慰佢。點知多多見到啱啱返診所返工嘅護士姐姐,就直撲過去要姐姐抱,媽咪想接過嚟抱返都被嫌棄、唔肯制添!

從多多媽咪喺Facebook分享嘅片段所見,多多被護士姐姐抱住,佢個頭貼住姐姐嘅心口係道喊。媽咪忍唔住講笑話佢好明顯係「吃豆腐」,被姐姐抱咗足足15分鐘,而且喊嗰陣其實一滴眼淚都冇㗎 XDD 媽咪話想抱返多多,但完全被多多無視,直言「瞬間玻璃心碎」。之後多多見到姐姐換咗護士制服,發覺頭先抱住自己嘅靚姐姐,其實同幫自己打針嘅係同一班人。媽咪話佢「馬上翻臉不認人,超好笑的」。

好多網友睇完段片,都話好「羨慕」多多,「放開那個姐姐」,另外亦有人懷疑媽媽大肚嘅時候睇得太多小新,所以多多先會小新「入血」呢!

 

圖:「羽俊&又元的生活點滴」Facebook專頁、網絡

【人狗情難斷 臨別依依相擁痛哭】

養過狗嘅人就會知,狗仔唔只聰明、忠心,佢哋對人嘅愛仲好pure、好true。同朝夕相對嘅主人分離時,會依依不捨甚至落淚。

近日,內地一名男子為咗生計,需要到外地工作,冇辦法再照顧由細養到大嘅狗狗。佢離開之前,四圍打聽,幫狗狗喺本地搵到個新主人。到咗要將狗狗交畀新主人嘅日子,當男子向新主人介紹狗狗作息時間、飲食喜好同生活習慣等寄養事項,狗狗似乎意識到將要同主人分開,竟然開始流眼淚。

諗住可以好瀟灑同好順利咁交出狗狗嘅男子,忍唔住用好重嘅語氣話狗狗:「你小子在新主人家,就要給我乖乖聽話」,但講完冇耐自己就哽咽落淚。男子想狠心離開,但走咗幾步又返轉頭攬住狗狗,人狗一齊喊,場面傷感。

睇到呢個情景,網友都淚崩了,「狗狗乖,主人賺到錢返嚟探你」。

 

圖:優酷

【識食一定係咁食】網民集思廣益分享「創意月餅料理」

中秋節一過,屋企嘅月餅堆積如山,有時真係聽到蓮蓉都飽。為咗加快消滅啲月餅,有網民喺網上跪求創意月餅料理,希望能夠盡用月餅各部分,創作新煮意,例如「咸蛋黃可以做黃金蝦」,咁另外蓮蓉同月餅皮又可以點搞呢?

有人就經典回帶、創意月餅料理祖師爺嘅作品「蕃茄月餅」,睇成品嘅做法非法簡單,就係煮熟蕃茄後加入切件嘅月餅,上碟!呢個拋磚引玉亦引嚟網民如潮水般嘅各式煎炒煮炸炆燉焗做法,真係「創作力量同幻想會嚇你一跳」,一定梗有一款啱你口味啦!今晚追月夜一於加餸啦!

嚟啦!發揮你嘅想像力,話俾我哋知你嘅「創意月餅料理」菜式啦!

【中秋好節目 一定唔會悶】

今日中秋節,偏偏天氣唔多好⋯⋯睇怕都幾難見到又大又圓嘅八月十五的月光嘞,唔知大家有咩節目呢?

 

若果天氣唔太差嘅話,大家不妨去賞下花燈。而家維園舉行緊「戊戌年中秋綵燈會」,係全港最大型花燈會,今晚8點至11點會有「綵燈晚會」。如果認為賞花燈有啲文靜,想睇刺激啲嘅節目,大家可以喺今晚8點15分到銅鑼灣大坑,欣賞舞火龍表演,表演會持續到10點半。若果今晚出唔到去,上述兩個節目喺聽日(25/9)都仲有得睇。

 

另外,大家仲記得的話,舊年利東街嘅特大月亮裝置變咗繼主角月亮之後,第二大熱門中秋必影物。今年利東街同中港城再接再厲,同國際著名澳洲藝術家Amanda Parer合作,展出10隻曾於80多個城市及40個國際藝術節巡迴展出嘅巨型月兔藝術裝置INTRUDE。又大又白又pure,真係十分應節!

 

好啦,介紹咗咁多,最重要都係好天、好天、好天!

 

祝各位有得早放!天公造美,中秋節快樂!

 

圖:網絡

【抄襲0分冇得上訴 教授:「勿致歉、勿申訴、勿求情」】

貓咪係人見人愛嘅動物,唔同品種嘅貓都各有「奴才」喜愛。但有一種貓相信係人見人憎,嗰種就係copycat嘞。近日,中國科學院大學副教授蘇湛怒斬copycat,將22位抄襲功課嘅學生評為0分,而且用文言文出電郵,講明「此分不改」。

蘇教授係「科幻文學與影視創作系列講座」課程嘅老師,這個課程嘅成績有兩部分:考勤60%,期末功課40%,而今學期嘅期末功課係創作科幻作品。本來就算唔交功課,出席率夠應該都可以合格,但蘇教授喺批改過程中見到有學生嘅作品「好到唔正常」,於是上網逐字逐句搜索,發現呢啲學生果然係抄襲網上作品,甚至抄法國作家凡爾納(Jules Gabriel Verne)嘅作品!

蘇教授認為抄襲對其他學生好唔公平,特別係嗰啲雖然文筆唔好,但依然努力創作嘅學生。於是佢決定重罰有抄襲嘅學生,158位選修學生中,有22位被判定抄襲,唔只功課0分,仲要「不問考勤,皆黜落」,全科肥佬。佢仲話做老師嘅一個基本原則,就係唔可以對抄襲行為姑息縱容。

 

圖:網絡、歷史趣聞

【扮大人戴頭盔 兩歲女童痰盂卡頭】

「時日太快,無知的小孩,一晚長大……」小朋友大得好快,而佢哋意識到自己大個,好多時係以前啲衫褲鞋襪唔啱著啦。不過浙江省一名兩歲女童就好可能會係因為被痰盂卡住個頭,而意識到自己真係大個女嘞。

女童嘅家長話,個女自細就有鍾意將痰盂戴落個頭到嘅「嗜好」,好似啲大人戴頭盔咁喎。以前囡囡可以好輕鬆咁自己將個痰盂除落嚟,估唔到呢次大個啲再戴,就因為個頭都大個咗而被痰盂卡住,自己無論點樣都除唔返落嚟,即使家長幫手都搞唔掂。

女童因為驚而不停咁喊,束手無策嘅家長唯有報警求助。警察到場先安撫女童嘅情緒,因為女童繼續喊好容易導致短時間缺氧,更加危險。之後警察再聯絡消防隊,消防員一嚟到就以專業工具切割痰盂,最後用咗20幾分鐘先將痰盂割開,等女童脫離危險。家長除咗即時講多謝,後來仲特登送咗兩面錦旗畀派出所嘅警察同消防大隊,再次多謝佢哋救咗自己個女。

呀女,你呢啲相好彩影唔到樣,但第時婚禮一定要播返出嚟呀 XD

 

圖:錢江晚報、網絡

【出道十年嘞!IU獻歌捐款慶祝】

「人生有幾多個十年!」喺2008年以歌手身份出道嘅韓國女星IU,今年迎嚟自己演藝事業上第一個十年嘞!為慶祝出道十週年,IU除咗會舉行巡迴演唱會,仲聯同樂迷向慈善機構捐款一億,感動一眾Fans。

IU出道之初,憑出色創作同精湛歌藝,好快得到多地Fans認同及喜愛,仲因為可愛中帶仙氣嘅外表而獲得「國民妹妹」稱號。如今「妹妹」已經成長為歌影視三棲,而且各方面都有優秀表現嘅實力派「姐姐」。IU喺音樂方面更有「音源大霧」嘅霸氣稱號,意思係只要佢一出新作品,就會好似大霧籠罩各排行榜。香港嘅Fans留意嘞,IU將會係下個月舉行出道十週年巡迴演唱會,主題係「2018 IU 10th Anniversary Tour Concert <이지금 dlwlrma>」(「이지금」係IU本名李知恩,「dlwlrma」係IU嘅IG帳號,亦係韓文鍵盤上打「李知恩」三字嘅對應英文字母),其中香港係第四站(韓國國外嘅第一站),喺12月8號舉行。

【愛心奇蹟!病危幼犬重獲新生】

愛心嘅力量可以有幾大?印度一隻叫Jumper嘅幼犬被發現時奄奄一息,但經過救援人員6個星期嘅悉心照料,唔只走出咗鬼門關,仲變得精靈活潑。

當日動物救援團體Animal Aid Unlimited喺路邊發現Jumper,佢被裝喺一個麻布袋入面,全身冇晒毛而且病得好重。可能已經好耐冇食過嘢,Jumper一見到餅乾就撐住虛弱嘅身體去食。救援人員想帶佢返去治療,但Jumper被人掂到就覺得好痛,尖叫起嚟。於是救援人員先用毛巾包住佢,再好小心咁抱佢上車返救援中心。救援人員喺中心同Jumper檢查,發現佢患咗皮膚病,而且臀部有好深嘅傷口,即刻幫佢做緊急救治同洗藥浴。Jumper接受完治療之後,情況慢慢穩定落嚟。

Jumper喺救援中心經過6個星期嘅休養,依家已經恢復健康,全身生返黑色嘅毛毛。佢仲活潑好動,同啲救援人員玩得好興奮。從當初好虛弱到依家紮紮跳,所以有好多網友都話「Jumper」(跳躍者)呢個名好襯佢,仲祝福佢可以早日搵到會好錫佢嘅主人。

 

圖:Animal Aid Unlimited

【電車男用玩具紙幣厄賣豆腐阿婆】

無良心!台灣最近有位擺檔賣豆腐嘅婆婆遇著一個揸住電車嘅男人拎咗張1000蚊嚟幫襯婆婆,當婆婆快快手找返900蚊俾佢之後,婆婆先察覺張1000蚊紙有啲奇怪,但當想追問個電車男時,佢已經踩行油走咗人,原來張1000蚊係玩具銀紙嚟!

婆婆雖然因為俾人厄咗錢好唔開心,但都無主動將件事周圍講,不過有熟客去檔口棒婆婆場時就發現婆婆眼濕濕,一問之下婆婆就好無奈地細訴被人厄錢嘅經過!友人聽完想為婆婆抱不平,所以將件事放咗上網,痛罵果個電車男之餘,亦令引起咗警方嘅注視,會為婆婆展開查調!

圖:ETtoday新聞雲

頁面