最新圏生活

【一票難求】Eason聽晚中環海濱開唱 4大網上平台同步直播

eason and the duo band 聽晚會喺中環海濱舉行《L.O.V.E. IS L.I.V.E.》慈善音樂會,門票經十多個慈善機構免費向基層市民派發,真係排通宵都排唔到。不過歌迷又唔駛咁灰住嘅,因為Eason已經宣佈音樂會會同步喺陳奕迅 Eason Chan的Facebook及YouTube Channel、my903.com 商業電台Facebook、UM Webzine 環球娛樂網誌,4個網上平台進行直播,總之聽晚6點保持網絡暢通,全世界都可以睇到呢場音樂會啦!

原圖:陳奕迅FACEBOOK PAGE

【特別收銀箱 令窮孩子都食得起小丸子】

 

宜家物價高企,買咩都貴,無論大人細路都係賣同一個價,但日本竟然有個大叔反其道而行,跟年齡嚟定價,咁究竟佢係點收費呢?

呢位賣章魚小丸子嘅大叔,經常揸住部貨車仔周圍去賣章魚燒。佢嘅收費特別,年齡越細收得越平,高中生要用100円(約7蚊港幣),初中生就要50円(約3.5蚊),而小學生只需10円(約7毫子)。大叔嘅收銀箱都好特別,箱底入面有鋪毛巾,咁樣入錢果陣就唔會發出聲響。大叔仲要求客人將錢握喺拳頭裡面入箱,咁就無人可以見到佢入幾多錢,入多嘅唔使肉赤,入得少嘅亦唔使自卑。大叔咁做嘅目的係為咗令貧窮嘅小朋友都可以透過呢個方法「俾錢」,然後享用章魚小丸子。

大叔呢種咁細心體貼嘅善舉喺Twitter瘋傳,網民紛紛讚佢有愛心,仲話如果社會上有多啲人肯咁樣做,世界會變得更美好。

圖:Twitter@Emiko

#愛心圈 #暖男大叔 #章魚小丸子

【求財啫】劫匪入舖打劫  店員:而家無錢晏啲再嚟

古有劉備三顧草廬,今有劫匪三次求財。日前數名劫匪走入比利時一間電子煙店行劫,醒目店員向佢哋表示店內無足夠嘅現金,但下晝會有2至3千歐羅(約港幣1.8萬至2.7萬),叫佢哋晏少少再嚟。劫匪聽到店員嘅說話後就走咗,仲話佢哋會返嚟!
 
店員趁佢哋走咗之後報警,不過警方都唔相信佢哋會再返頭架嘞。點知到咗當日下午5點半,班劫匪真係返嚟,店員唯有同佢哋講未夠鐘收舖,叫佢再晏啲嚟過。到6點半收舖時間,呢班劫匪第三次嚟到呢間舖頭「打劫」,但佢哋都係一蚊都無攞到,仲好順利咁被警方拘捕,因為警察一早已經喺舖頭周圍等緊佢哋。最後,警方喺呢件案件中拘捕咗5名男子,包括一名未年成人士。

【#metoo】Lady Gaga 重提19歲被性侵經歷 冀鼓勵女性勇敢發聲

Lady Gaga 貴為美國流行天后,去到邊都係眾人焦點。但鎂光燈下,Gaga 有過一段慘痛嘅被性侵經歷,令佢至今講起都傷心落淚。

Gaga 近日喺美國出席時尚雜誌《ELLE》舉辦嘅年度荷李活女性頒獎典禮,致辭時重提及自己喺19歲被性侵嘅事。佢當時每日都被侵犯,但冇向人求助,反而選擇逃避,收埋自己。雖然 Gaga 後來嘗試鼓起勇氣,同演藝界嘅「有權人士」講返件事,但冇一位願意幫佢出頭,連一句建議都冇,「那些男人躲起來,因為他們害怕失去權力」。講起呢段往事,佢亦忍唔住落淚。

Gaga 直言喺典禮上講呢段經歷有感到羞愧,「依然覺得『這是我的錯』」。但佢希望自己依家企出嚟,可以話俾其他女性知道,遇到挑戰同悲劇要互相幫助,勇於發聲。佢亦呼籲大家要多啲關心同協助有需要嘅人:「我有機會作出改變,我祈求我們能聆聽、相信,並給予身邊的人更多的關心。」

 

圖:Lady Gaga@Twitter

#愛心圈  #Lady Gaga  #反對性侵

【大腦「白平衡機制」搞事 你睇到咩色?】

 

之前曾經有一條唔知係白金色定藍黑色嘅裙,引發睇到兩種唔同顏色組合嘅網友爭辯不休,圖中呢對vans又引起一番顏色之爭!有人話係粉白色,另一邊又話係灰綠色,咁究竟佢係咩色?又係咩原因令到唔同人睇到嘅顏色都唔一樣呢?

呢種現象原來同大腦嘅色彩恒常性(color constancy)機制有關,就好似我哋影相咁,相機或者手機本身有一個可以幫你調節相片色調嘅白平衡功能,而大腦嘅色彩恒常性就同相機嘅白平衡機制相似。睇到對鞋係粉白色嘅人,係因為大腦嘅白平衡機制會根據周圍嘅環境光綫、物件顏色對比度等因素,幫手調節咗色調,令人可以睇到物件本身嘅顏色。相反地,如果睇到對鞋係灰綠色嘅話,就係因為腦內嘅白平衡機制無將周圍嘅光源因素考慮在內,對眼睇到咩色就係咩色,從而對物件原本嘅顏色認知有偏差。

所以,其實對鞋真係粉白色嘅,官方係無出同款嘅灰綠色鞋嘅,唔知你哋又睇到咩色呢?

#奇趣圈 #科學圈 #對鞋咩色 #色彩恒常性 #大腦白平衡機制

【紀念沉沒110周年 新鐵達尼號2022年重新啟航】

「You jump, I jump」、「I am the King of the World」一講起依啲經典對白就會諗起凄美愛情電影《鐵達尼號》,唔經唔覺鐵達尼號因撞上冰山而沉沒都已經有一百年,為紀念沉沒110周年(1912年~2022年),官方確認鐵達尼號將於2022年重新啟航!

 

鐵達尼二號仿製船將會耗資500億美元由中國建造,同鐵達尼號一樣可容納2,400名乘客同900名工作人員;而新船嘅外型同艙內嘅布局都會以鐵達尼號為藍本,會有頭等艙、二等艙同三等艙,連裝修亦會仿造原船;新船亦會行走原本嘅航線,由南安普敦橫跨大西洋航向紐約,之後都會環遊世界為旅客服務。

 

為咗減低大家對撞上冰山而沉沒嘅憂慮,官方強調雖然艘船嘅造型係一樣,但船上所有設施都會用21世紀技術去打造,亦會配備最先進嘅導航同安全系統。唔知大家又敢唔敢去搭呢?

 

#旅遊圈 #電影圈 #鐵達尼號 #YoujumpIjump # IamtheKingoftheWorld #2022 #重新啟航

【前方「高」能】傻賊打劫要 WeChat 過數 金額超出上限得個桔

依家電子支付服務好流行,好多人都開始用,就連賊人亦與時並進。昨日(23日)朝早,一個賊人打劫便利店,佢並冇要求店員交出現金,而係威嚇店員將錢以 WeChat Pay 過數俾佢!誰不知金額超出過數上限。

賊人係約30歲嘅男性,中等身材,啡金色短髮,打劫時著灰色長袖衫同黑色短褲,並戴上口罩。佢闖入長沙灣一間7仔,向店員遞上紙條話要打劫,跟住攞部手機出嚟,要店員將1萬5千蚊入落佢個 WeChat Pay 電子錢包。但店員話咁樣過唔到數,並要求賊人離開。懷疑賊人見對方唔就範,情緒激動,就話身上有「炸彈」。店員隨即撳警鐘求救,賊人嚇得落荒而逃。

警方多架衝鋒車趕到現場,警員立即封鎖現場,並喺附近兜截賊人,但未有發現。警方暫時將案件列作企圖行劫處理,繼續調查。而涉事店員冇受傷,便利店亦冇損失。

根據「WeChat Pay HK」門店現金增值規則,一般客戶每日增值上限為港幣1萬元,而每月上限則為5萬港元。

 

圖:電影《天下無賊》劇照

#科技圈  #奇趣圈  #WeChat Pay

【列車翻側壓同學13歲少女忍痛救3人】

 

危機處理嘅重要性係影響到能唔能夠成功救己救人!最近台灣宜蘭發生嚴重火車出軌事故,造成唔少人命傷亡。有位13歲少女經歷完一瞬間車廂天旋地轉,火車鐵片四散,當佢意識到發生咩事之後,佢第一時間執起跌係身邊嘅電話,不過佢唔係打俾屋企人而係打電話報警求助,之後仲唔理自己傷勢同現場環境安唔安全,忍住痛咁搬開火車甩出嚟嘅鐵片,成功救出3位被困嘅同學仔!直到被送到醫院後佢先打電話俾屋企人報平安!多得佢嘅臨危不亂同大愛嘅精神先可以將傷亡人數減低,所以話真係唔好睇少小朋友啊!

【新娘嬲爆 18個同事人情夾埋共1314】

 

結婚係人生大事,擺幾圍酒席請親戚朋友嚟飲就通常都唔少得㗎喇,但如果請嘅嘉賓通通唔賞面唔嚟,剩係夾份俾封「大利是」過你,你又笑唔笑得出?

有個湖北準新娘,結婚之前邀請咗工作部門嘅20位同事連上司嚟婚宴,同事收請帖果陣都話一定到場祝福咁話。點知婚宴當日,到場嘅剩係得1位部門上司同1位同事,而其他18位同事只係夾埋一齊轉帳咗人民幣1314蚊俾新娘,寓意祝福一對新人一生一世。新娘就梗唔高興啦,成圍酒席得果2個人出席,輸咗人氣不特止更蝕埋酒席錢添!18個人嘅人情先得1314蚊,平均每人100蚊唔夠,遠遠低過市面公價嘅300蚊。

新娘將呢件事發上網,有網民就勸新娘唔洗咁介懷:「同事們是表面朋友,不要對他們太實在」、「以後他們有誰結婚,你也這麼搞」、「同事關係表面上過得去就行,不必較真」。不過,亦有網友認為結婚擺酒,原意係接受大家嘅祝福,太著緊人情反而會令婚宴變咗質。

圖:網絡圖片

#社會熱話 #婚宴人情

【70歲伯伯攻讀生物研究所碩士 仲拎埋獎學金】

成日聽人講「活到老,學到老」,台灣就有位70歲嘅伯伯(賴聰朗)做個好榜樣俾大家睇喇!依位70幾歲嘅賴伯伯未退休前係一位工程師,已經有博士學位,曾經參與過多項重大嘅建設同軌道嘅工程,佢退而不休,而家讀緊碩士,仲要勁到攞獎學金添!

賴伯伯退休後就專注農務,但因為佢爸爸同太太都不幸因癌症而病逝,加上伯伯整親脊椎,令佢行動不便,唔可以再務農,所以伯伯就把心一橫重拾書本鑽研醫學喇。

賴伯伯而家係中國醫藥大學攻讀生物研究所碩士,佢唔係Hea讀過吓日晨架,仲勤力到差唔多科科都拎A添。之前去慈善機構申請獎學金時,仲被誤會係幫個孫申請!不過又好難怪既,因為伯伯係獎學金發放以嚟年紀最大嘅申請者,以前申請人年齡都係10歲到20幾歲!伯伯真係好堅揪呀!

頁面