最新圏生活

【台灣70歲老友記潮玩Pokémon Go】

為咗打機你可以去到幾盡?廢寢忘餐定日日都貨金?

曾經風摩全球嘅手遊Pokémon Go熱潮雖然減退,但仍然有班忠實粉絲追棒,台灣就有位人稱「寶可夢阿公」嘅70歲老友記(陳三元)嘅超級忠粉玩家,依位老友記為咗捉精靈除咗每個月都會貨金300美元(約新台幣9360元),仲愈買愈多手機去玩,而家已經有15部手機嘞,仲為咗可以去到唔同地方捕捉稀有嘅精靈,佢仲花費咗超過4800美元(約新台幣14萬元)改裝咗部單車,又為咗可以日捉夜捉,佢仲幫架戰車度身訂造咗套行動電源組,咁就可以隨時隨地為佢果15部手機叉電喇。因為佢套非常完善嘅設備非常搶眼,所以好多Pokémon Go粉絲見到佢時都會捉住佢合照,令陳伯都變成Pokemon GO界嘅風雲人物添!

圖:中央社

【二次創作】有Jackeline 無騙案!

洗到大家腦就係一個成功嘅廣告,就好似好多人睇到「有Jackeline,無暗瘡」依句Slogan就即刻有聲有畫。

最近香港警察反詐騙協調中心(ADCC)就睇中咗依個非常成功嘅廣告,仲將佢二次創作變成一個防騙易熱線(18222)嘅宣傳片。依條宣傳片除咗模仿當年拍攝手法同故事內容之外,仲搵咗Jackeline(楊小玲博士)出鏡添喎!好多網友睇到都異口同聲話回憶返晒嚟,仲大讚依個宣傳手法好有創意,好成功入腦添喎!

【我啲錢呀】一世唔買 iPhone 可以慳返超過兩百萬

智能手機 iPhone 係好多人嘅「Dream 機」,每次一有新型號推出,全球各地「果粉」都蜂擁專門店購買,多多錢都照俾。但美國一項研究發現,果粉一世人用嚟買 iPhone 嘅錢,可以係近30萬美元(約235萬港元)!

研究由美國比價公司「Flipsy」所做,佢哋假設一個美國人由18歲開始用 iPhone,之後每32個月換一次新機,去到78歲就已經買咗22部手機,一共使咗超過7萬5千美元(約60萬港元),呢個數除咗手機本身嘅價錢,仲包括60年內買 App 同支付上網服務嘅費用。

覺得60年內用 iPhone,一年先使1萬銀好濕碎?咁就大錯特錯嘞,用 iPhone 背後其實有巨額嘅機會成本(opportunity cost)。Flipsy 公司指,如果將用喺 iPhone 嘅使費存入銀行,因為通貨膨脹而每年會有約4%嘅回饋,60年內嚿錢就會滾大到近30萬美元(約235萬港元)!而如果一世人每兩年先買1部150美元(約1200港元)嘅 Android 手機,每個月只支出20美元(約160港元)相關費用,咁樣自己退休嗰陣就可以有多20萬美元(約160萬港元)用嘞。

 

圖:SlashGear

#科技圈  #生活圈  #iPhone  #慳錢  #退休

【智能化世代】手機應用程式都可以辦離婚?

而家係智能化嘅世代,只要有部電話有得上網就乜都處理到,最近江西省政府同「支付寶」合作推出手機應用程式「贛服通」,透過依個APP可以處理到成百樣政府服務,例如稅務、出入境、社保等,最引起網友討論嘅係連「電子離婚證」都有,有啲網友睇到就話以後離婚就方便得多,又有人話依個服務完全乎合「後現代愛情觀念」。 

不過江西省民政廳社會事務處副處長羅鐵軍近日就澄清返,「電子離婚證」只係一個憑證,係為咗方便大眾用電子證件去處理其他事務而設,例如房地產同稅務事務等等,並唔可以上網處理結婚同離婚架,大家唔好誤會嘞。

#生活圈 #智能化世代 #贛服通 #電子離婚證

【男人的約定】男子跑馬拉松握兒子遺照衝線痛哭

好多人為咗證明自己嘅能力,會選擇挑戰跑馬拉松,而對呢名失去兒子嘅父親嚟講,跑馬拉松係同個仔「男人之間嘅承諾」。

鄉村教師李鋼原本同16歲嘅兒子約定要參加日前舉辦嘅「2018南昌國際馬拉松比賽」,仲約定要取得300名內嘅成績。可惜阿仔喺今年8月遇溺身亡,無法同李綱一齊參賽,但李鋼堅守同阿仔嘅承諾,將阿仔嘅遺照收喺手套參加比賽,跑到中途靠住嗌阿仔個名堅持跑落去,直到衝線後佢終於忍唔住跪地痛哭,亦因此令佢同阿仔嘅故事為人所知。

李鋼喺今次比賽跑出34名嘅好成績,但對佢嚟講更大嘅意義係實現咗同阿仔之間嘅承諾。佢同記者表示會盡快返家鄉,要將獎牌放喺阿仔嘅墳前,同將比賽成績燒畀阿仔睇。李鋼仲話:「無論是以前還是現在,馬拉松對於我來說,就是一個人要有毅力、要堅強。」

原圖:新華視點影片截圖

【益街坊】綠屋變身「茂蘿街7號」 市民可免費使用空間

灣仔茂蘿街同巴路士街一帶有10幢被統稱為「綠屋」嘅唐樓,原本係市區重建局同香港藝術中心合作項目「動漫基地」所在地。今年8月動漫基地撤出,綠屋由市建局自行管理,推出新項目「茂蘿街7號」,提供約3200呎公共空間予市民同團體免費使用。

茂蘿街7號都係個文化創意項目,所在嘅綠屋地下同一樓係零售店及餐飲設施,二至四樓係工作室、活動空間同展覽場地。除咗有公眾免費用嘅公共空間,綠屋亦會提供約4000呎嘅租用場地。

如果市民同團體想免費使用公共空間,可以向市建局申請,而活動必須係非商業或慈善性質,內容亦要經過市建局審批。活動舉行期間不可以阻礙其他市民使用公眾休憩空間同有關設施。

 

圖:網絡

#文化圈  #開心圈  #生活圈  #創意藝術

【好心大叔自發修葺行山路】

 

香港人越嚟越注重健康,行山成為唔少人嘅運動之選,雖然香港好多熱門行山地點都有山徑,但時間耐咗難免會有磨蝕,行山人士一個唔覺意仲好有可能會受傷。有位好心大叔自發拎住支錘仔上山,將山徑梯級凸出嚟嘅角鐵逐個逐個揼返落去。

呢位大叔嘅善舉被經過嘅行山人士影低擺咗上網,網民紛紛大讚大叔有心,仲話:「當我每一次行山時,都會心存一種感激」、「要小心,不要弄傷腰骨」、「你嘅好意我哋收到晒,但安全要緊。」

圖:FB@香港行山之友~Nick Ho

#愛心圈 #好人好事 #行山之友

【遺愛人間】離世後捐出器官 年輕媽媽延續正能量

34歲年輕媽媽謝碧琪(Maggie)早前因腹痛到荃灣港安醫院求醫,準備切除「朱古力瘤」前獲醫生處方抗生素「羅氏芬」(Rocephin),作術前殺菌。豈料 Maggie 出現嚴重敏感,一度心臟停頓,並陷入昏迷,最終不幸離世。雖然呢位4個小朋友嘅媽媽離開咗,但遺愛人間,將器官捐出,延續愛心。

Maggie 生前簽署咗器官捐贈卡,佢丈夫王先生喺 Facebook 表示,一家人會尊重太太意願,「把她僅餘還有用的器官捐贈予有需要的人」,給予其他病人生命希望。王先生形容 Maggie 係個「美麗女人,常幫助別人」,希望大家可以記住佢呢位美麗可愛有善心嘅太太。佢又提到,自己同太太嘅故事絕對「能帶正能量給大家的」,所以打算將之寫成一本書,「希望能為人生上遇到逆境的人打打氣」。

 

圖:Facebook@Kenji Wong

#愛心圈  #生活圈  #器官捐贈  #大愛

============================

「生命因你再現姿彩!」希望大家支持器官捐贈,以生命延續生命 ,為急需器官的病人帶來一個重生的機會。

【台女Google Map街景功能「再見」亡母】

而家科技真係好發達, Google Map嘅街景功能就可以帶大家眼睛去旅行,分分鐘大家嘅身影會被Google Map捕捉咗添。最近就有位台灣女網友好掛住已離世嘅媽咪,靈機一觸用Google Map睇吓會唔會搵到媽咪嘅身影,當佢輸入屋企地址後,真係俾佢搵到佢媽咪企係屋企花園嘅影像,果刻女網友就好似再次見到佢媽咪咁,仲好感觸咁話「媽,找你那麼久,原來你一直都在家裡哦!媽,沒事,我們都很好,只是很想你了!」

#洋蔥圈 #GoogleMap #眼睛去旅行 #媽咪永遠在你心裡

【「米」、「最」字錯啲乜? 字詞表玩謝家長學生】

 

 

DSE中文科考卷近年被譽為「死亡之卷」,原來中文科由小學開始就已經令學生怕怕!有家長喺群組大吐苦水,話小朋友嘅中文功課經常被老師捉錯字,好多錯字就連家長自己都唔知錯乜,好似「米」字最後一劃係捺,要有腳,「最」字上面原嚟唔係日,真係搞到學生同家長一臉黑人問號樣。

 

雖然呢兩年不斷有新聞報導關於小學生學習中文字感到困擾嘅報導,但由於中文字源遠流長,同一個字喺演變途中出現唔少字形變化,再加上坊間嘅印刷字形同手寫字形唔同,好容易會令學生混淆,根本分唔清邊隻係正字。對此,教育局亦有出字詞表俾老師、家長參考,小編試過上香港小學學習字詞表度搜尋「告」字,發現左手邊教人筆順嘅「告」字清楚見到係由「牛」同「口」組成,但右邊嘅字詞表入面,就明顯見到「告」上面唔係「牛」,而係無穿頭嘅。同一個頁面嘅字形尚且唔同,又點能夠要求小學生分辨得到呢?

 

教育局同好多中文老師都認為,糾正學生錯字係必要,但切忌矯枉過正,令學生失去學習中文字嘅興趣。不過見到啲功課被圈到滿江紅就知道,現實係,教育局有教育局講,老師有老師改,最後難為嘅咪又係一班學生……

 

圖:FB@家長Secrets

#教育圈 #字詞表 #漢字規範

頁面