最新圏生活

【麥當勞實行「走塑」逢星期一「無飲管日」】

近年好多食肆不論小店定連鎖快餐店都開始講環保,麥當勞都緊追呢大趨勢喇,所以近日香港麥當勞公告,為響應環保,全線麥當勞和McCafé即日起,每逢周一實行「無飲管星期一」。

不過呢個消息一傳開,大眾市民嘅反應大不同。有人表示支持覺得可以保護環境,仲可以用自備嘅杯或可再用嘅飲管飲野,但亦唔係人人受落,有市民覺得好唔方便話「無飲管,咁喺條街度點飲?」,仲有網友話「市民逢周一列無麥當勞日」。

小編就覺得習慣既野可以慢慢培養,不如大家都習慣吓為環保出一分力啦!

【救護員實現了臨終伯伯的願望:一杯麥當勞焦糖雪糕新地】

若果死前可以食一樣嘢, 你會食乜?

有日昆士蘭救護車團隊收到個通知,要送一位同前列腺癌搏鬥咗17年72歲嘅伯伯Ron去臨終安寧病房,係途中Ron嘅太太Sharon McCartney同兩位救護員Kate同Hanna講Ron依兩日無乜點食野,Kate同Hanna得悉後就問Ron:「如果乜都食得,你而家最想食咩呢?」Ron同太太二人對望,諗都無諗就答係麥當勞嘅焦糖味雪糕新地。救護員相信嗰程車,好可能係Ron去到人生終點前嘅最後一程車,所以佢地決定係途中去麥當勞買焦糖味雪糕新地俾Ron食,希望能夠完成佢臨終最後一個願望。

拎著雪糕嘅Ron好似細路仔咁,食到污糟邋遢,但卻食得津津有味。係佢病後難得食得咁開懷嘅一次。

Ron最終係9月初病逝,佢嘅囡囡係網上公開多謝昆士蘭救護車團,仲話爸爸好開心可以係佢人生最後一次自行進食時,可以食到佢最想食嘅雪糕新地,「佢永遠都抵抗唔到焦糖雪糕新地嘅誘惑」,又大讚兩位救護員嘅行為令爸爸同佢嘅屋企人係悲傷嘅低谷情緒中得到大大嘅溫暖。

依件事得到網友力讚昆士蘭救護團隊,亦重提昆士蘭救護團隊去年都有類似嘅溫暖行為。希望所有嘅救護團隊都繼續發揮關愛精神,令到病人同佢地嘅家屬都係低谷中得到正能量!

圖:Queensland Ambulance Service@Fb

【學校棄單 巿民合力拯救5,000麵包】

 

台灣一間包店日前發文,指有間學校訂咗5000個麵包最後竟然棄單,直呼慘情,結果網友同心合力下,5000個包最後全數賣出。不過事件卻鬧出懸案,有關包店嘅黑材料之後愈揭愈多。

 

間位於台灣高雄嘅餅店喺網上發文求助,話有間學校向佢哋大量訂購餐盒,師傅們日做夜做趕製烘烤成品但卻遭惡意退訂,5000多個麵包同波士頓派都面臨報銷命運,於是大平賣,10台幣(約港幣$2.5),話希望唔好辜負師傅嘅一番心血。雖然有人半信半疑,但消息一出仍然係一呼百應,大家都本著「救包要緊」嘅心,結果全部包都賣唒。

不過之後有人網友揭啲包本身就係賣10蚊……;又話人話老闆娘長期拖欠人工;網友都話「如果店家被挖出的黑歷史屬實,那真的非常可惡,濫用大家的善心⋯⋯」。雖然有人建議店主公開嗰間學校嘅資料,搞清楚件事,但店家就話唔希望影響間學校為由,無再交代詳情,只強調係真有其事。

 

圖片: 鳳山李雨蓁 Lí Ú-chin@Fb

【引擎蓋下發現「躲貓貓」 車主呼籲有愛心朋友領養】

記得天氣凍時有網友呼籲,開車前敲打一下架車,以防有浪浪喺車底避寒,但原來唔知天氣凍嘅時候先要咁做。日本有位朋友仔係開車前檢查吓架車時,發現有一家貓仔匿埋咗係引擎蓋下面! 佢將呢件事拍咗片放咗上Twitter,片段迅速被瘋傳,網友大讚貓仔可愛之餘都擔心貓仔佢地嘅安危,紛紛問事主會點樣安置啲貓咪。事主就向各網友大派定心丸,表示因為貓咪仲細又搵唔到佢地嘅媽媽,驚會發生有咩意外,所以暫時會親自照顧佢地,同時都幫佢地尋覓緊新主人,不過事主都唔安心將貓咪交託俾陌生人,所以暫時會先呼籲自己有愛心嘅朋友領養。好幸運地暫時有兩位朋友有意領養,希望好快所有貓仔都搵到對佢地好好嘅貓奴喇!

圖:_Spacia_@Twitter

【國民質素】地震過後排隊購糧水            北海道巿面保持秩序井然

 

日本北海道尋日(6/9)發生黎克特制6.7級強烈地震,最少做成16人死亡,26人失蹤、受傷人數超過360,多區一度無水電供應。新千歲機場同新幹線列車今日中午前後再度開通,有望令民眾盡快回家或安排暫避。有住喺當地嘅網友分享災後嘅影片、相片,見到食物、水、日用品都已賣光,雖巿民要排隊買氣罐、氣油,但巿面仍然維持秩序井然,有企業亦主動伸出援手,日本人冷靜應對災難同互助精神,又一次令人讚嘆。

 

地震過後北海道部份地區一度斷水斷電,目前局部恢復電力供應。Facebook專頁「台灣女孩的北海道生活」板主分享,有電信公司提供免費手機充電服務,等災民可以同外界保持聯繫,得到最新嘅救援情報、天氣訊息等:而超巿亦無因此發災難財,反而係減價幫助民眾。由於無電供應,喺板主分享嘅一段片段見到好多人上街購買氣罐燃料,人龍連綿不絕,但大家都井井有條,無人打尖、無人搶購,令人驚嘆!

 

圖: 台灣女孩的北海道生活@Fb

【語言不通 大媽笨豬跳叫足兩分鐘】

去到外國旅行,語言不通真係個大問題,分分鐘仲會變成國際笑話添。

 

話說內地有個大媽去紐西蘭玩Bungy jump,教練喺隔離ready倒數咗幾次,大媽依然笑騎騎企定定喺度。教練又叫咗幾次「jump」,大媽都係無jump,剩係不斷喺度「啊啊啊啊啊~」,仲係咁幫自己「加油加油加油」,無限loop,但就係唔跳!

 

就係咁,大媽竟然企喺度足足叫咗2分鐘,幫自己加咗2分鐘油,都唔肯跳落去,搞到側邊兩個教練又無奈又好笑。最後都要靠教練做手勢,示意佢跳佢先卒之跳落去,大媽跳落去果下好爽快,望落去一啲都唔畏高,仲好似好enjoy添。事後問返先知,原來,大媽因為聽唔明英文,以為教練叫佢「jump」即係叫佢「叫」(jump同普通話「叫」讀音有啲相似),所以佢就係咁叫喇。

 

圖:AJ Hackett Bungy New Zealand@FB

【唔好郁攞錢出嚟】日搶匪用鼻毛剪搶劫失敗落荒而逃

當人走投無路,可能會鋌而走險做錯事。近日日本新宿一間便利店內發生一宗劫案,一名男子拎住武器喺收銀枱前企圖搶劫,但店員一啲都唔驚,因為佢手上嘅武器係一把「3CM鼻毛剪」。該男子當時向店員大叫「攞錢出嚟。」當店員準備去收銀機攞錢時,搶匪又叫佢唔好郁,令店員相當困惑,搶匪見店員無乜反應,焦急之下只能落荒而逃,最後被捕。

當地警方調查後發現,搶匪係一名49歲嘅無業遊民,因為需要錢所以決定搶劫便利店。唔少人知道武器係一把鼻毛剪都覺得好荒謬,但人被逼到即使得一把鼻毛剪都放手一搏,以乎有啲心酸。

【塑膠圈殺死澳洲鴨仔!】

近年大家都多咗關注塑膠物料會影響到海洋生物,但現實中又有做幾多去保護佢地呢?

 

最近Facebook專頁「Western Australian Seabird Rescue」就上傳咗兩張由Veronica McPhail影嘅相,同時都分享咗個不幸嘅消息。澳洲珀斯南部有隻鴨仔被一個膠圈封嘴,當地人同組織發現想拯救佢時已經太遲。版主即時黎個集思廣益問大家究竟點樣先可以避免同類型嘅不幸事件再次發生?拒絕或減少使用一次性塑膠物料?幫手清潔海邊嘅垃圾?有網友就話所有塑膠包裝都應該要徵稅、亦有人提議當係丟棄塑膠前應該要先剪爛個圈先。

 

大家又有咩提議呢?又有冇坐言起行實出黎呢?

 

圖:Western Australian Seabird Rescue@Fb

【綑綁樹下10年 老狗自由16天圓夢後離世】

Miss Willie係一隻生活喺美國嘅哥基混種犬。佢嘅主人將佢綁喺樹下10年,風吹雨打,一直都拒絕俾義工將佢救走,直到有一日義工探望,發現Willie情況危急,主人先肯放棄飼養。義工帶走Willie,陪佢完成各樣看來好平凡,但Willie一生都未做過嘅願望。Willie度過一生中最快樂嘅16日後,喺一班好愛錫佢嘅人身邊安祥離世,終年12歲。

 

Willie自細就被主人綁喺樹下,無論係炎夏定冬,都係咁由佢喺無瓦遮頭嘅地方,生活環境惡劣。義工組織 PETA 10年前發現佢嘅情況後懇求主人放棄飼養,希望可以交俾佢地幫Willie搵過一主好人家但被拒絕。雖然係咁,義工一直都無放棄 Willie,定期探望,確保佢有最基本嘅食物、水、玩具,甚至幫佢整咗間屋仔度過寒冬。

 

今年8月義工見到 Willie情況嚴重,終於獲准帶走佢。檢查後發現佢有心絲蟲、肺部亦有腫瘤,生命進入倒數。義工Jes知道Willie嘅可憐身世後為佢計劃咗「遺願清單」,坐船、坐車、去海邊、食Pizza、開生日會, Willie 終於可以一嘗一隻家犬被愛嘅滋味。度過一生最快樂嘅16日後,終於離開人世。

 

截圖: PETA@YouTube

【日本出年要加消費稅?】

Made in Japan嘅貨物有質量保證,一直以來都係香港人團購、代購、網購嘅熱門之選,唔少人一年去幾次日本就係為咗買又平又靚嘅藥妝。但係,各位,噩耗嚟喇,因為日本首相安倍晉三話:出年10月會竭盡所能咁上調消費稅,由8%上調到10%!

有買開日本貨嘅人都知,日本嘅商品除咗原本嘅價格之外,仲有一項消費稅,宜家日本嘅消費稅等於貨品價格嘅8%。如果出年個消費稅真係加到10%,即係話,每件日本貨嘅整體價格都會上升,去日本旅行買嘢、食嘢都會貴咗!
 
聽到呢個消息,唔知大家又會唔會趁未加價飛多幾轉日本掃貨呢?

圖:網絡圖片

頁面