最新圏生活

【遇到導盲犬影唔影得?】

 

近年多咗導盲犬,搭地鐵見到受訓練中嘅導盲犬難免引起大家好奇。最近有網民喺地鐵影咗兩隻受訓中導盲犬伏喺車廂地板嘅相,上載上網並寫上「牠!碘(點)解! 訓在車廂內!」。而相片被一個寄養家庭批評,咁樣做可能影響到狗狗引路工作。結果事件引發熱烈討論。

 

該寄養家庭發文,不滿年學習中嘅幼犬被偷拍完擺上網討論,「你要影相,可以問帶領者,佢地會樂意幫你又或俾你影,因為其實當你影嘅同時有機會會影響到學緊習中嘅幼犬,而如果係有導盲鞍就盡量避免干擾,因為會影響到佢地引路工作」。

 

不過網友都唔太明白影相係點影響到幼犬,「又唔係開閃光燈,請問影張相可以對導盲犬有幾多影響?」、「隻狗被偷拍覺得吾公平?吾尊重?乜嘢狗嚟架,咁高智慧!原本喺中性討論,並不帶任何貶意,連討論吓都吾得」其他網友同寄養家庭就解釋,「人地無話唔比影,係想對方問聲先影...」,亦有人建議幫導盲犬着件衫,寫清楚「導盲犬訓練中,請勿拍照」。

 

再睇返原本貼出狗狗瞓喺車廂嘅post,原來有人誤會,以為扒喺度係有病,但其實喺交通工具上扒低係正確嘅動作。或者因為見到一啲誤解嘅留言而激起寄養家庭? 其實導盲犬協會有教,見到導盲犬應該「三不一問」:不干擾、不餵食、不拒絕、主動問問視障人士是否需要協助。

 

【萌爆小男孩連番向豬仔包道歉】

 

近日微博有段熱爆影片,一個兩三歲嘅小男孩準備食一個豬仔造型嘅包包之前,先溫柔同歉疚咁摸著個包連番道歉,「小豬對不起,我要把你吃掉呢,真的很抱歉。小豬你答應我好不好?你說說話啊小豬!」,非常可愛,網友都被呢個可愛嘅暖男瞬間融化!

 

片段長幾十秒,只見呢個小暖男望著豬仔包一臉擔心,鬼馬嘅媽媽一邊拍片,一邊代小豬回話「好吧好吧」。取得小豬同意嘅小暖男之後又再問小豬「我可以捏開你吃嗎?」,當佢搣咗小豬耳仔放入口食之際,突然聽到小豬話嗌「噢!我的耳朵!」,小暖男嚇到碌大眼仔,即刻喺個口拎返舊包出嚟幫豬仔裝返,超級可愛,網友都話「好善良的弟弟,看看他的表情,我都要融化了!」

截圖: 我叫小翔寶@抖音

【香港著名漫畫家阿虫逝世享年85歲】

香港著名漫畫家阿虫(嚴以敬)嘅Facebook專頁公佈,阿虫因突發性心臟衰竭,美國時間8月11日清晨在美國洛杉磯家中安詳離世,當時,太太、女兒、女婿和外孫們都在身旁,享年85歲。

 

阿虫原名嚴以敬,1933年廣州出生,年幼時來港,初期畫政治漫畫為主,作品刊載於《快報》和《天天日報》。阿虫於80 年代移民美國,開始以水墨畫風、大自然景物、配以甚具禪味字句作畫。佢自嘲「不能成龍,只好成虫」, 1984 年開始以「阿虫」名義發表畫作。

 

專頁又提到,8月8日是阿虫85歲生日,家人藉著這特别的向他送上了祝福,也算是一種安慰:並謂「人如其畫,阿虫離開時已放下一切塵世的包袱,陪伴著他回到自然的,只有愛」。喪禮將會按阿虫生前意願,以簡單佛教儀式舉行,遺體火化後,將安奉在洛杉磯的西來寺。

 

圖: AhChung 阿虫@Facebook, Dynamixhktv@YouTube

【《妖怪手錶》新角色日本勁收投訴】

 

妖怪手錶由game到動畫,一直都深受小學生歡迎。唔知係咪因為佢嘅主要觀眾都開始大個,最近喺日本播出嘅一集出咗一隻新嘅妖怪「水煲丸」,無論外型以至絕技都耐人尋味。

 

有網友覺得無乜嘢,「五諗衰野既話有乜問題?仲好搞笑添」,但亦有人覺得有性暗示,驚嘆而家啲小朋友好重口味。

 

你又點睇呢?

【河南獨生子女可享20日有薪假照顧住院父母】

 

 

內地有好多嘢值得我哋學習,放假就係一個好例子嘞!河南最近推出「護理假」,凡係獨生子女嘅員工,如果父母要入院治療,僱主就需要每年累計給予不少於20日嘅有薪護理假,等佢哋可以一盡照顧父母。

 

其實護理假喺內地都唔係新事,全國有8個省巿都有同類安排,以黑龍江為例,獨生子女照顧入院父母嘅護理假有20日,非獨生子女都10日,講緊100%full pay架!

 

反觀香港,well,法例規定,產假都係俾8成; 侍產假? 「一日都唔應該有」。唔知喺假期呢方面幾時可以趕上內地呢?

【餐廳餵奶被要求遮住 媽媽神回覆「限奶令」】

母乳好處多多,所以愈來愈多媽媽選擇餵母乳,之但社會上嘅接納程度似乎仲未追得上。美國位媽媽喺餐廳餵奶,被一個男士要求佢用餵奶巾遮,佢就選擇咁樣回應。

 

事件嘅媽媽Melanie Dudley早前同3個小朋友同埋老公,到墨西哥度假,當地而家嘅天氣同香港都差不多,又熱又潮濕,氣溫有庐度,當佢喺一間餐廳餵奶時,一個陌生男人要求佢遮著。呢位好EQ高嘅媽媽無即時同個男人嘈,反而將塊巾蓋著自己塊臉,藉此諷刺個男人。相片由Melanie嘅奶奶一個朋友,獲授權上載,吸引20萬人分享,網民都大讚呢位媽媽好有智慧。

 

有人提議佢不如去廁所餵,亦有人讚成要用巾。不過都有好多人回應返「你會唔會去廁所食飯?」、「廁所咁污糟」、「你自己試吓用條巾冚著個頭食飯」。

 

圖: Carol Lockwood@Fb

【00後同70後唱K 大呻老野同事點「張國榮、張學友呢啲衝唔出香港嘅歌手」】

【00後同70後唱K 大呻老野同事點「張國榮、張學友呢啲衝唔出香港嘅歌手」】

到底00後同70後嘅距離有幾遠呢? 網上有個疑似90後/00後,話同個70後嘅「old seafood」去唱K,點咗一啲唔知咩嘅「垃圾歌」,上網一查,原來「張國榮、張學友呢啲衝唔出香港嘅嘅歌手」,語出驚人,震驚一眾網民。

 

嗰位網友喺討論區呻,同班90後、00後同輩唱K,無啦啦有個70後又話要加入;去到K房佢哋點咗一堆韓文歌啦,「當然少不了Big Bang IU 呢啲高質韓星」,點知位「老野無啦啦點埋啲咩『有心人』『遙達的他』呢啲聽都未聽過嘅垃圾歌,上埋(網)查一查先知係咩張國榮、張學友呢啲衝唔出香港嘅歌手」,又話以後無咩必要都係唔好同啲老野唱K。

 

此PO一出,引嚟極大回響。有網友post返哥哥張國榮1989年喺韓國拍嘅廣告;又有人指出,哥哥憑1987喺香港推出嘅電影《倩女幽魂》打入韓國市場,早喺1989年和1994年當選韓國「最受歡迎外國影星」。當然唔只喺韓國,哥哥喺日本亦好受歡迎同尊崇,佢係首位獲得日本影評人協會最佳男主角的華人男演員,亦喺日本開過20場個人演唱會,締造香港歌手在日本開演唱會的場次紀錄。至於被譽為係歌神嘅張學友,有網友就提醒,「人哋張天王而家世界巡迴演唱緊wor」。

 

【山西男屋企漏煤氣食煙定驚】

常識題:當你發現屋企漏煤氣會點算?

山西一個男人返到屋企發現漏煤氣,好機警咁即刻閂煤氣制。閂咗制,以為無事啦,天時暑熱喎,於是佢就開返個冷氣! 然後,再點支煙冷靜冷靜!然後,嘭,爆炸!個男人好好彩,雖然有少少燒傷,但就無生命危險,不過間屋就損毀嚴重。

 

小編喺度奉勸大家,戒煙啦!

 

另外根據機電工程署指示,如遇上懷疑漏煤氣,你應該:

●弄熄所有明火;

●避免使用電話或開關任何電掣及電器用具;

●盡量打開所有門窗,讓氣體消散;

●如情況許可,應立即關掉供氣管道於氣體錶上游的緊急控制閥(氣體錶總掣),以截斷氣體供應;而石油氣瓶裝置則應拔掉連接石油氣瓶的調壓器,以截斷氣體供應;

●在漏氣情況嚴重或對有關情況不肯定時,立即離開有關單位並用手拍門通知鄰居緊急疏散;利用樓梯離開建築物,撥999通知消防處,以及致電氣體供應公司,通知緊急服務人員前來處理;

●讓氣體供應公司檢查所有室內氣體裝置包括爐具、石油氣瓶等,以確定安全後,方可恢復使用氣體。

 

截圖: 易網

【神翻譯】小巴貼告示  車長=car length??

 

香港呢個國際大都會(好似係),告示出中英文就唔少得啦。最近網上就流傳一張小巴上搵到嘅告示,個英文寫法…..隻隻字都識,但拼埋一齊梗係有啲怪怪地咁嘅?

原句中文係「下一站落車乘客,請按電鐘通知車長」,翻譯成英文後就變成「The next stop off the passengers, please press the ball to inform the car length.」,press the ball?? Car length?? 又幾有創意喎。

 

有網友懷疑係google translate出事,不過有人就實測過,結果顯示「The next stop passenger please press the electric clock to inform the bus captain」,咦,咁唔好賴google translate喎。

 

網友都慨嘆,「仲話學咗英文幾十年,香港英語能力嚴重走下坡,究竟關邊個事?」

 

頁面