【台女同男友鬧交 拉扯領養19日小狗街頭棄養】

台灣一個少女日前半夜將一隻小狗女拉到街頭、用狗帶扯上石壆,狗女個頭更被撞到石壆。少女之後後將狗狗拉到一個暗角棄養,原因竟然係因為同男朋友鬧交。

 

小狗被發現時有一條短嘅狗帶綁咗喺一部電單車上,行唔到、趴唔到。換句話講,佢好可能已經孤伶伶咁企喺度被雨淋咗成晚。少女惡行被附近嘅CCTV拍低,救援人員係狗狗身上發現晶片,一查之下,原來少女只係養咗佢19日就將佢無情拋棄。

 

高雄市動保處接獲通報同個女仔聯絡,佢解釋當晚同男朋友鬥交,而一時氣憤做出不當行為。根據當地法例,隨意棄養動物係違反《動物保護法》,可被罰款新台幣3萬以上、15萬以下,並列入黑名單,終生不得在公立收容所認養犬貓。而協助領養嘅團體「社團法人台灣愛狗人協會」亦已表明,決不會俾小狗返去個女仔度。

 

動物唔係禮物,唔係出氣袋,無愛心就唔好養!

 

圖: 社團法人台灣愛狗人協會