【high大咗】難得中獎先分享 內地男獎金被冒領

有咩慘過唔中六合彩?就係中咗但無錢收。江蘇有位張先生日前買咗張彩票中咗大拿拿100蚊人民幣,對於未中過獎嘅張生嚟講係一件好值得記錄嘅事,於是佢好興奮地影咗張中獎彩券相上載去朋友圈炫耀一番!

點知第二日佢好開心諗住去攞錢時發現,獎金一早已經被人領咗,原來佢之前上載去朋友圈嘅彩券上面有個中獎編號,只要有呢串數字就可以喺網上領獎,體彩中心仲查到,有關彩票喺可領獎時間後35秒內被網上兌現咗,真係快手!